මගේ ගමන

පයින් ඇවිද ගිය දවසේ සිට අන් අයට මඟ පෙන්වන අද දක්වා

“එකම වසර 75 වතාවක් ජීවත් වී, එයට ජීවිතය යැයි නොකියන්න.”

මට අවශ්‍ය වුණේ දවසක් ගෙවා තවත් දවසකට යන්න විතරක් නෙවෙයි. මගේ ජීවිතය වෙනස් කරගන්න. අම්මාට හයියක් වෙන්න. මගේම හීන සැබෑ කරගන්න.

ඒ ගමන ආරම්භ වූ තැන Sri Lanka Insurance Life.

අද මගේ ජයග්‍රහණ ගැන කතා කරන විට, ඒවාට පිටුපසින් තිබුණු දවස් ගැනත් කියන්න ඕනෑ. මොකද මේ කතාවේ වටිනාම කොටස සම්මාන ලැබුණු දවස විතරක් නෙවෙයි. අත්හරින්න හිතුණු දවස්වලත් මම ඉදිරියට ගිය එකයි.

2007: වෙනස් ජීවිතයක් සොයාගත් තරුණයෙක්

[පළමු ඡායාරූපය — 2007 වසරේ මම]

මට වයස අවුරුදු 12දී තාත්තා නැති වුණා. අම්මාට ස්ථිර ආදායමක් නොතිබුණු නිසා, අපේ ආර්ථික අපහසුතා මට කුඩා වයසින්ම දැනුණා. උසස් පෙළ අධ්‍යාපනය අතහැර රැකියාවක් සොයන්න සිදු වුණෙත් ඒ නිසයි.

2007 අප්‍රේල් මාසයේ රාජ්‍ය මුද්‍රණ සංස්ථාවේ රැකියාවකට අවස්ථාවක් ලැබුණා. එහි සිටියේ එක් දවසක් පමණයි. එතැනින් ඉවත් වීම පහසු තීරණයක් වුණේ නැහැ. ඒත් මගේ හිත කිව්වේ මගේ ජීවිතය ගොඩනඟාගත හැකි මඟක් සොයාගන්න කියලා.

එදා මගේ හීන විශාලයි. හැබැයි මුලින්ම මට ඕනෑ වුණේ ඉතා සරල දෙයක්: මගේම මෝටර් සයිකලයක්.

පයින් ගිය කිලෝමීටර්, බඩගින්නෙන් ගෙවූ දවස්

[දෙවැනි ඡායාරූපය — මගේ වෘත්තීය ජීවිතයේ ආරම්භය]

2007 මැයි 15 වැනිදා මම Sri Lanka Insurance කඳාන ශාඛාවට එක් වුණා. මට ජීවිත රක්ෂණයක් විකිණීමට උදව් වන පවුල් පසුබිමක් තිබුණේ නැහැ. පුළුල් සමාජ සම්බන්ධතා තිබුණෙත් නැහැ.

තිබුණේ එක තීරණයක් විතරයි: කොහොම හරි මේ ජීවිතය වෙනස් කරගන්නවා.

මම දිනකට කිලෝමීටර් තුන හතරක් ගෙයින් ගෙට පයින් ඇවිද්දා. සමහර දවස්වල දවල්ට කෑමක් ගන්න බැරිව වතුර බීලා හිටියා. එක් ගෙදරකින් ප්‍රතික්ෂේප වුණාම ඊළඟ ගෙදරට ගියා. එතැනිනුත් බැහැ කිව්වාම තවත් ගෙදරකට ගියා.

“Insurance agent කියන්නේ හිඟන රැකියාවක්” කියලා අපහාස කළ අය හිටියා. “උඹ හිඟා කනවා” කියපු අයත් හිටියා. ඒ වචන නොරිදුණා කියලා මම කියන්නේ නැහැ. රිදුණා. ඒත් මගේ හීන අත්හරින්න තරම් ඒ වචනවලට ඉඩ දුන්නේ නැහැ.

ඒ කැපවීමෙන් මට කඳාන ශාඛාවේ අංක එකේ උපදේශකයා වෙන්න හැකි වුණා. සම්මාන උළෙලේදී ලැබුණේ සහතිකයක් පමණයි. එදා ඒ දැවැන්ත වේදිකාව දිහා බලලා මම තවත් හීනයක් දැක්කා: දවසක මමත් එතැනින් සම්මානයක් ගන්නවා.

මාස හයකින් සැබෑ වූ පළමු හීනය

[තුන්වැනි ඡායාරූපය — මගේ පළමු මෝටර් සයිකලය]

රක්ෂණ උපදේශකයකු ලෙස වැඩ ආරම්භ කර මාස හයකින් මම මගේම මෝටර් සයිකලයක් ගත්තා. එතෙක් අපේ ගෙදර වෙන කාටවත් බයික් එකක් තිබුණේ නැහැ.

එය ගෙදරට ගෙනා දවසේ මට සතුටට ඇඬුණා. පළමු දවසේ බයික් එක පැද්දේ කුරුල්ලෙක් වගේ නිදහසක් දැනෙමින්.

සමහර අයට එය මෝටර් සයිකලයක් පමණක් වෙන්න ඇති. මට එය සාක්ෂියක් වුණා. පයින් ගිය දුර, විඳපු බඩගින්න සහ අත්නොහැර කළ උත්සාහය අපතේ ගිහින් නැහැ කියන සාක්ෂියක්.

මම වෙනස් වුණේ පෙනුමෙන් විතරක් නෙවෙයි

[හතරවැනි ඡායාරූපය — වෙනස් වෙමින් ගිය මම]

මේ පින්තූරයේ කොල්ලා ටිකක් හැඩවෙලා නේද? 🤭

ඒත් සැබෑ වෙනස පෙනුමට වඩා ඇතුළතින් සිදු වුණා. මම මිනිස්සු සමඟ කතා කරන්න, ඔවුන්ගේ අවශ්‍යතා අහන්න, ප්‍රතික්ෂේප වීමෙන් ඉගෙනගන්න සහ නැවත උත්සාහ කරන්න ඉගෙනගත්තා.

ඒ ගමන මට කියා දුන් පාඩමක් අදත් මම විශ්වාස කරනවා: අද ඔබ සිටින තැන, හෙට ඔබට ළඟා විය හැකි තැන තීරණය කරන්නේ නැහැ.

මගේ ජයග්‍රහණ

[පස්වැනි ඡායාරූපය — වේදිකාවේ සැබෑ වූ හීනය]

2021දී, සමූහ කණ්ඩායම් නායකයකු ලෙස දිවයිනේ හොඳම සම්මානය දිනාගැනීමට මට හැකි වුණා. කාලයකට පෙර සහතිකයක් අතේ තබාගෙන හීන දැකපු ඒ වේදිකාවේම, මගේ කැපවීමට පිළිගැනීමක් ලැබුණා.

ඉන්පසුත් ගමන නතර වුණේ නැහැ. මගේ වෘත්තීය ගමනේ සුවිශේෂී පිළිගැනීම් අතර:

• 2021 — Sri Lanka Insurance Life දිවයිනේ හොඳම සමූහ කණ්ඩායම් නායකයා
• 2023 — SLIM National Sales Awards හි Best Sales Supervisor
• 2023–2026 — MDRT සුදුසුකම් ලැබීම
• 2024 වසරට අදාළ Star Awards — Insurance Advisor Special Achievement සහ Group Leader Special Achievement ඇතුළු පිළිගැනීම්
• 2025 — Platinum Club සාමාජිකත්වය

[හයවැනි ඡායාරූපය — ලැබුණු තවත් පිළිගැනීම්]

මේ සම්මාන මට ආඩම්බරයක්. ඒත් ඒවා දකින හැම වතාවකම මට මතක් වෙන්නේ ගෙයින් ගෙට පයින් ගිය තරුණයා. ඔහු එදා අත්හැරියා නම්, මේ කිසිවක් සිදු වෙන්නේ නැහැ.

මේ ගමනේදී මට සහාය වූ බොහෝ දෙනෙක් ඉන්නවා. ඔවුන් අතරින් මගේ බිරිඳ සුචිත්‍රා ප්‍රසංගි ගැන විශේෂයෙන් කියන්න ඕනෑ. අමාරු කාලයේ ඇය මා අත්හැරියේ නැහැ. මේ වෘත්තියට පිවිසීමේ අවස්ථාව මට ලැබුණෙත් ඇය නිසා. මගේ සාර්ථකත්වයේ ඇයගේ ශක්තියට විශාල තැනක් තියෙනවා.

අද මම ගොඩනඟන්නේ මගේ සාර්ථකත්වය විතරක් නෙවෙයි

වයස අවුරුදු 17–18දී මම රැකියාවක් ඉල්ලා බොහෝ දෙනා පසුපස ගියා. අද මට මගේම කාර්යාලයක් තිබෙනවා. තවත් කෙනෙකුට අවස්ථාවක් ලබා දෙන්නත් මට පුළුවන්.

මේ වන විට මම විශාල කණ්ඩායමක් ගොඩනඟමින් සිටිනවා. ඒ කණ්ඩායමේ MDRT ජයග්‍රහණ ලබාගත් සාමාජිකයන් රැසක් සිටීම මට විශේෂ ආඩම්බරයක්. මගේ මුල්ම හීනය මෝටර් සයිකලයක් ගන්න එක වුණත්, අද මගේ හීනය තවත් විශාලයි: මා සමඟ එක්වන අයත් තමන්ගේම හීන සැබෑ කරගන්නවා දැකීම.

මම කණ්ඩායමක් නිර්මාණය කරන්නේ තනතුරු පිරවීමට විතරක් නෙවෙයි. එක් එක් පුද්ගලයාගේ හැකියාව හඳුනාගෙන, ඔවුන්ට තමන්ගේම වෘත්තීය ගමනක් ගොඩනඟා ගැනීමට මඟ පෙන්වන්නයි.

අලුතින් එක්වන කෙනෙකුට වැඩේ ඉගෙනගන්න සහාය අවශ්‍යයි. ප්‍රශ්නයක් අහන්න පුළුවන් කෙනෙක් අවශ්‍යයි. ප්‍රතික්ෂේප වුණාම නැවත උත්සාහ කරන්න හයිය අවශ්‍යයි. ඒ දේවල් මම දන්නවා; මොකද මමත් ඒ තැනින්ම ආපු කෙනෙක්.

මගේ අත්දැකීම් බෙදාගනිමින්, කණ්ඩායමේ සාමාජිකයන්ට තම ඉලක්ක පැහැදිලි කරගන්න සහ ඉදිරියට යන්න මම සහාය වෙනවා. ඔවුන් ජයග්‍රහණය කරන විට, මට දැනෙන්නේ තවත් කෙනෙකුගේ ජීවිතය වෙනස් වෙමින් තිබෙන බවයි.

ඔබේ කතාව මෙතැනින් පටන් ගන්න

ඔබට අද විශාල සමාජ සම්බන්ධතා නැති වෙන්න පුළුවන්. මේ වෘත්තියේ අත්දැකීම් නැති වෙන්න පුළුවන්. මම ආරම්භ කළ දවසේ මටත් ඒවා තිබුණේ නැහැ.

ඔබට ඉගෙනගන්න කැමැත්තක්, උත්සාහ කරන්න සූදානමක් සහ ඔබේ ජීවිතය වෙනස් කරගැනීමේ අරමුණක් තිබෙනවා නම්, අපි කතා කරමු.

ජීවිත රක්ෂණ වෘත්තියේ ඔබේම ගමන ගොඩනඟා ගැනීමට මගේ අත්දැකීම් සහ මඟපෙන්වීම ඔබ සමඟ බෙදාගන්න මම සූදානම්.

තුසිත කුමාර
Senior Financial Consultant | Award-Winning Group Leader | MDRT Member
Sri Lanka Insurance Life

[මගේ කණ්ඩායමට එක්වීම ගැන විමසන්න]